സന്തോഷം നിറഞ്ഞ ജീവിതത്തിന് ഫ്രാന്‍സിസ് പാപ്പ നല്‍കുന്ന 10 ചിന്തകള്‍

 

യുവജനമേ, നിങ്ങള്‍ എവിടെയാണെന്ന് കണ്ടെത്തുക യുവജനങ്ങള്‍ മാര്‍പാപ്പയോട് ചോദിച്ചു: ലോകത്തെയും മനുഷ്യരെയും സംരക്ഷിക്കുന്നതിന് മനുഷ്യന് കഴിവുണ്ടോ? തിന്മയുടെ മധ്യത്തില്‍ ദൈവത്തിന്‍റെ സാന്നിദ്ധ്യത്തെക്കുറിച്ച് മാര്‍പാപ്പ എന്തു പറയുന്നു?ڈ മാര്‍പാപ്പയുടെ മറുപടി അവരോട് രണ്ടു ചോദ്യങ്ങളായിരുന്നു. ڇഎവിടെ ദൈവം? എവിടെ മനുഷന്‍? ഇരുപത്തിയൊന്നാം നൂറ്റാണ്ടിലെ മനുഷ്യ നീ എവിടെയാണ്? ڈ തുടര്‍ന്ന് മാര്‍പാപ്പ വിശദീകരിച്ചു. മനുഷ്യന്‍, തന്നെ തന്നെ കണ്ടെത്തുമ്പോള്‍ ദൈവത്തെ അന്വേഷിക്കും. ആത്മാര്‍ത്ഥതയോടെ സത്യം അന്യേഷിക്കുമ്പോഴും നന്മയുടെയും സൗന്ദര്യത്തിന്‍റെയും വഴിയില്‍ സഞ്ചരിക്കുമ്പോഴും മനുഷ്യന് ദൈവത്തെ കണ്ടെത്താന്‍ കഴിയും. മാര്‍പാപ്പ ഉറപ്പിച്ചു പറഞ്ഞു:ڇഒരു “യുവവ്യക്തി, സത്യത്തെ സ്നേഹിക്കുകയും  അത് അന്വേഷിക്കുയും ചെയ്യുമ്പോള്‍, നന്മയെ നന്മയായി സ്നേഹിക്കുമ്പോള്‍ തീര്‍ച്ചയായും അവന്/അവള്‍ക്ക് ദൈവത്തെ കണ്ടെത്താനാകും. എന്നാല്‍ ഈ വഴി ദീര്‍ഘമേറിയതാകാം. ചിലര്‍ അത് കണ്ടത്തിയില്ലെന്നും വരും. എന്നാല്‍ ആ അന്വേഷണത്തിലൂടെ അവര്‍ പക്വത പ്രാപിക്കും; ദൈവത്തെ കണ്ടുമുട്ടാന്‍ പ്രാപ്തരാവുകയും ചെയ്യും. ആത്യന്തികമായി അതു കൃപയാണ്. എങ്കിലും അത് വ്യക്തിപരമായി കണ്ടെത്തുക ആവശ്യമാണ്. വൈയക്തികമായ ഒരു പാത നടക്കുന്നതിലൂടെ അതു കണ്ടെത്തും. അങ്ങനെ അതു വൈയക്തികമായ ഒരു പ്രവര്‍ത്തിയും ആകും. തെറ്റുകളില്‍ നിന്നڈ് എളിമ പഠിക്കുക ജ്ഞാനത്തിന്‍റെ പുസ്തകത്തില്‍ നിന്ന് ഉദ്ധരിച്ചുകൊണ്ട് ഫ്രാന്‍സീസ്സ് മാര്‍പാപ്പ പറഞ്ഞു. “നീതിമാന്‍ പോലും ദിവസം ഏഴുപ്രാവശ്യം തെറ്റു പറ്റുന്നു.”  മനുഷ്യന്‍ മാത്രം ഒരേ സ്ഥലത്ത് വീണ്ടും വീണ്ടും വീഴുന്നു, വീഴ്ചയില്‍ നിന്നു പഠിക്കുന്നില്ല. മൃഗങ്ങള്‍ക്ക് അതു പറ്റാറില്ല. ഒരു വ്യക്തി തന്‍റെ തെറ്റ് അംഗീകരിക്കുന്നില്ലെങ്കില്‍, അയാള്‍ ഔദ്ധത്യം, പൊള്ളപ്പകിട്ട്, അഹങ്കാരം, ഗര്‍വ്വ് എന്നിവയില്‍ നിപതിക്കും. തെറ്റുകള്‍ തന്‍റെ ജീവിതത്തില്‍ വലിയ ഗുരുവായിരുന്നുവെന്നും ഏറെ പാഠങ്ങള്‍ അവ പഠിപ്പിച്ചുവെന്നും മാര്‍പാപ്പ യുവജനങ്ങളോടു പറഞ്ഞു. നാം അതി മാനുഷരെന്നു ചിന്തിക്കുമ്പോള്‍ തെറ്റുകള്‍ നമ്മെ എളിമപ്പെടുത്തും. നമ്മെ നമ്മുടെ യഥാര്‍ത്ഥസ്ഥാനത്ത്  നിറുത്തും. തന്‍റെ നിര്‍ബന്ധബുദ്ധി കാരണം എല്ലാ തെറ്റുകളില്‍ നിന്നും താന്‍ പഠിച്ചില്ല എന്ന ഖേദചിന്ത മാര്‍പാപ്പ തുറന്നു പറഞ്ഞു.  തെറ്റുകളില്‍ നിന്നും താന്‍ പഠിച്ചുവെന്നും അത് തനിക്കു നന്മയായെന്നും കൂട്ടിച്ചേര്‍ത്തു.  നാം തെറ്റുകള്‍ മനസ്സിലാക്കുന്നതും ഒരേ തെറ്റ് ആവര്‍ത്തിക്കാതിരിക്കുന്നതും പ്രധാനപ്പെട്ട കാര്യമാണ്, നല്ലതുമാണ്. യുവജനങ്ങള്‍ തങ്ങളുടെ തെറ്റുകളില്‍ നിന്നു പഠിക്കാന്‍ അവയുമായി ഒരു സംഭാഷണത്തില്‍ ഏര്‍പ്പെടണം. എളിമയുള്ളവരാകാനും നല്ലവരാകാനുമുള്ള കഴിവാണത്. മാര്‍പാപ്പ വീണ്ടും തന്‍റെ അനുഭവം പറഞ്ഞു: “ചെറുപ്പക്കാരനായ സുപ്പീരിയര്‍ എന്ന നിലയില്‍ ഞാന്‍ അധികാരപ്രമത്തതയോടെ പെരുമാറാനിടയായി. എന്നാല്‍, ഞാന്‍ ഒരു പാഠം പഠിച്ചു. മറ്റുള്ളവരെ കേള്‍ക്കണം. അവര്‍ എന്താണ് ചിന്തിക്കുന്നതെന്ന് മനസ്സിലാക്കണം. എങ്കിലേ നല്ല അധികാരിയായിരിക്കാന്‍ പറ്റൂ. അധികാരപ്രമത്തത ശരിയല്ല എന്നും പഠിച്ചു. കൂടുതല്‍ എളിമയുള്ളവനാകാന്‍ എനിക്കു സഹായകമായി.” എവിടെയാണ് ദൈവത്തെ കണ്ടെത്തുക യുവാക്കള്‍ മാര്‍പാപ്പയോട് ചോദിച്ചു: ‘അങ്ങ്  എവിടെയാണ് ദൈവത്തെ കണ്ടെത്തുന്നത് ?  ഫ്രാന്‍സീസ്സ് മാര്‍പാപ്പ പറഞ്ഞു: ‘ജീവിതസാഹചര്യത്തില്‍ ഞാന്‍ ദൈവത്തെ അന്വേഷിക്കുന്നു. ബൈബിളിലും കൂദാശയുടെ പരികര്‍മ്മത്തിലും പ്രാര്‍ത്ഥനയിലും കണ്ടുമുട്ടുന്ന ജനതകളിലും ചെയ്യുന്ന ജോലികളിലും ഞാന്‍ ദൈവത്തെ കണ്ടെത്തുന്നു.രോഗികളിലും ജയിലറയില്‍ കഴിയുന്നവരിലും ദുഃഖിതരിലും ദരിദ്രരിലും ദൈവം സജീവനായി നിലകൊള്ളുന്നു. അനീതിയുടെ അനുഭവങ്ങള്‍ എനിക്കു ദൈവവുമായി സംഭാഷണം നടത്താന്‍ അവസരമാകുന്നുണ്ട്”. ഒപ്പം അദ്ദേഹം കൂട്ടിച്ചേര്‍ത്തു: ഞാന്‍ ആഗ്രഹിക്കുന്നതുപോലെ ദിവസവും എനിക്ക് പൂര്‍ണ്ണമായി ദൈവത്തെ കണ്ടുമുട്ടാന്‍ കഴിയുന്നില്ല. എന്നാല്‍ ഞാന്‍ അതിലേക്കുള്ള  വഴിയിലാണ്… പ്രാര്‍ത്ഥന നമ്മെ നോക്കാന്‍ ദൈവത്തെ അനുവദിക്കുന്നത് അവിശ്വാസിയായ ഒരു പെണ്‍കുട്ടി ഒരിക്കല്‍ എന്നോടു ചോദിച്ചു: “അങ്ങ് എങ്ങിനെയാണ്’ പ്രാര്‍ത്ഥിക്കുന്നത്?” ഞാന്‍ പറഞ്ഞു: “ഞാന്‍ ബൈബിള്‍ വായിക്കുന്നു. ദൈവം എന്നെ നോക്കാന്‍ ഞാന്‍ എന്നെത്തന്നെ അനുവദിക്കുന്നു. അതാണ് എനിക്ക് പ്രാര്‍ത്ഥന. അത് വെറും വികാരതാരള്യമല്ല. ഞാന്‍ ആഴത്തില്‍ അനുഭവിക്കുന്ന കാര്യമാണ്. ചിലപ്പോള്‍ ദൈവം എന്നോട് ഒന്നും പറയുകയില്ലായിരിക്കും. എങ്കിലും അത് ദൈവത്തോടുള്ള സംസാരസമയമാണ്. ഞാന്‍ ഉറങ്ങുക പോലും ചെയ്തിട്ടുണ്ട്. ഒരു പുത്രന്‍ പിതാവിന്‍റെ സാന്നിദ്ധ്യത്തിലായിരിക്കുന്നതുപോലെയാണിത്. പുത്രനാണെന്നനുഭവിക്കുന്നതുതന്നെ പ്രാര്‍ത്ഥനയാണ്. ഇതാണെന്‍റെ പ്രാര്‍ത്ഥനാരീതി. മാര്‍പാപ്പ പറഞ്ഞു: “ഞാന്‍ പ്രാര്‍ത്ഥിക്കുന്നു. കാരണം പ്രാര്‍ത്ഥിക്കാനും ദൈവത്തോട് സംസാരിക്കാനുമുള്ള അനേകം ആവശ്യങ്ങളാല്‍ ഞാന്‍ നിര്‍ബന്ധിക്കപ്പെടുന്നു. ഞാന്‍ ജനങ്ങള്‍ക്കായി പ്രാര്‍ത്ഥിക്കുന്നു. അവര്‍ അവരുടെ പ്രശ്നങ്ങളും സഹനങ്ങളും എന്നോടു പറയുമ്പോള്‍ ഞാന്‍ പ്രാര്‍ത്ഥിക്കാന്‍ കടപ്പെട്ടവനാകുന്നു. യുദ്ധങ്ങളുടെ നടുവില്‍ ഞാന്‍ പ്രാര്‍ത്ഥിക്കുന്നു. വിശപ്പുകൊണ്ടു മരിക്കുന്നവരുടെ ഫോട്ടോകള്‍ ഞാന്‍ കാണുമ്പോള്‍ എങ്ങിനെ പ്രാര്‍ത്ഥിക്കാതിരിക്കാന്‍ കഴിയും? ലോകത്തെ മുഴുവന്‍ തീറ്റിപ്പോറ്റാനുള്ളത് ഇന്ന് നമുക്കുണ്ട്. എന്നിട്ടും ഈ ദാരിദ്ര്യം എനിക്കു മനസ്സിലാക്കാന്‍ കഴിയുന്നില്ല. അനേകര്‍ വിശപ്പുകൊണ്ടു മരിക്കുന്നു. എനിക്കിത് ഘോരമായി അനുഭവപ്പെടുന്നു. ഇതെല്ലാം എന്നെ പ്രാര്‍ത്ഥിക്കാന്‍ നിര്‍ബന്ധിക്കുന്ന കാര്യങ്ങളാണ്.” മോശമായ ഭയം തള്ളിക്കളയുക, നല്ല ഭയം ഉള്‍ക്കൊള്ളുക എന്തിനെയാണ് ഭയപ്പെടേണ്ടതെന്ന ചോദ്യത്തിന് മാര്‍പാപ്പായുടെ മറുപടി ശ്രദ്ധിക്കുക: ഭയം ഒരു സ്വാഭാവിക കാര്യമാണെന്നും അതു തനിക്കുമുണ്ടെന്നും മാര്‍പാപ്പ പറഞ്ഞു. “ഭയപ്പെടേണ്ട”,എന്ന് സുവിശേഷം പറയുന്നത് നാം ഓര്‍ക്കണം. നാം ജീവിതത്തെ ഭയപ്പെടുന്നവരും വെല്ലുവിളികളുടെ മുമ്പില്‍ പരാജയപ്പെടുന്നവരുമാണ്. ദൈവത്തെ ഭയത്തോടെ കാണുന്നവരുമുണ്ട്. ഭയപ്പെടുന്നതിനെക്കുറിച്ച് നാം അസ്വസ്ഥരാകേണ്ട. എന്നാല്‍ ഭയപ്പെടുത്തുന്നത് എന്ത്, അതിന്‍റെ സാഹചര്യം എന്ത് എന്ന് വിശദമാക്കാന്‍ നാം അന്വേഷിക്കണം. മറ്റുള്ളവരുടെ സഹായം തേടാനും നാം ശ്രദ്ധിക്കണം. തുടര്‍ന്ന് മാര്‍പാപ്പാ പറഞ്ഞു. “ഭയം എപ്പോഴും നല്ലൊരു ഉപദേശകനല്ല, കാരണം, അതു മോശമായ ഉപദേശമേ തരൂ. അത് ശരിയല്ലാത്ത വഴിയിലേക്ക് നമ്മെ തള്ളിയിടും. ആ ഭയം മോശമാണ്. അതു നിങ്ങളെ ദുര്‍ബലപ്പെടുത്തുകയും തുടച്ചുനീക്കുകയും ചെയ്യും. അത്തരം ഭയം നിര്‍മാര്‍ജ്ജനം ചെയ്യുക തന്നെ വേണം.” നമ്മെതന്നെ അറിയുക വളരെ പ്രധാനപ്പെട്ട കാര്യമാണ്. നമുക്ക് ഏറ്റവും അധികം തെറ്റു പറ്റുന്നത് എവിടെയെന്ന് നാം അറിയുകയും അന്വേഷിക്കുകയും വേണം. അതേക്കുറിച്ച് നമുക്ക് ഭയം വേണം. അതു നല്ലതാണ്. നല്ല ഭയം വിവേകം പോലെയാണ്. അതു നമ്മോട് നമ്മുടെ ബലഹീനതയെ പറ്റി പറയും. അതിന് അടിപ്പെടാതിരിക്കാന്‍ സഹായിക്കുകയും ചെയ്യും. ഉപസംഹാരം യുവജനങ്ങള്‍ ലളിതജീവിതത്തിന് സാക്ഷ്യം വഹിക്കണമെന്ന് മാര്‍പാപ്പാ പറഞ്ഞു. ആരെയും നിര്‍ബന്ധിച്ച് മാറ്റാന്‍ ശ്രമിക്കരുത്. വിനയത്തോടെ പ്രതാപത്തിന്‍റെ സര്‍വ്വാതിശായിത്വഭാവം വെടിഞ്ഞു സാക്ഷ്യം നല്‍കുക. സ്വയം മഹത്വപ്പെടുത്തുന്നത് പാപമാണ്. അഹങ്കാരത്തിന്‍റെ വിജയഭേരി മുഴക്കുന്നത് ആത്യന്തികമായി പരാജയപ്പടാനേ ഇടയാക്കൂ സുവിശേഷത്തിന്‍റെ വെളിച്ചത്തില്‍, ഒരു ചോദ്യമുന്നയിച്ചുകൊണ്ട് മാര്‍പാപ്പാ തന്‍റെ സന്ദേശം അവസാനിപ്പിച്ചു. “എവിടെയാണ് നിങ്ങളുടെ വിധി?” ഉത്തരം ഓരോരുത്തരും കണ്ടെത്തണം. നിങ്ങളുടെ ഹൃദയങ്ങളെ നന്മയിലേക്കും സത്യത്തിലേക്കും സൗന്ദര്യത്തിലേക്കും നയിക്കുക; അധികാരം, ശക്തി, പണം, അഹങ്കാരം, ജീവിതാഹന്ത എന്നിവയിലേക്കു നയിക്കരുത്. എങ്കില്‍ സമാധാനവും സന്തോഷവും അനുഭവിക്കുവാന്‍ നിങ്ങള്‍ക്കിടയാകും.

കുരിശാണുരക്ഷ… കുരിശിലാണു രക്ഷ

കോണ്‍സ്റ്റയിന്‍ ചക്രവര്‍ത്തിയുടെ അമ്മയായ ഹെലേന രാജ്ഞി സ്വപ്നത്തിലെ ദര്‍ശനമനുസരിച്ച് ഈശോയെ തറച്ച കുരിശിനായുള്ള അന്വേക്ഷണത്തിനിടയില്‍ ജറുസലേമില്‍ മാതാവിന്‍റെ പ്രതിമ പ്രതിഷ്ഠിച്ചിരിക്കുന്ന ഒരു ക്ഷേത്രം കണ്ടെത്തി.ഹെലേന രാജ്ഞിക്കുണ്ടായ ആത്മീയദര്‍ശനമനുസരിച്ച് ആ ക്ഷേത്രത്തിനു താഴെ കുഴിച്ചപ്പോള്‍ കര്‍ത്താവിന്‍റെ കല്ലറയിലേക്കുള്ള കവാടം തുറന്നുകിട്ടി.ആ കല്ലറയില്‍ നിന്നു തന്നെ മുന്നു കുരിശുകളും കണ്ടെത്തി.കര്‍ത്താവിന്‍റെയും ഒപ്പം തറയ്ക്കപ്പെട്ട കള്ളന്മാരുടേതാണ് ആ കുരിശുകള്‍ എന്ന് അനുമാനിക്കപ്പെട്ടു.പക്ഷെ മൂന്നു കുരിശുകളില്‍ ഏതിലാണ് കര്‍ത്താവ് തൂങ്ങിമരിച്ചതെന്നറിയാതെ രാജ്ഞി കുഴങ്ങി.അവിടെ നിന്നു തന്നെ’ യൂദന്മാരുടെ രാജാവായ നസ്രായനായ ക്രിസ്തു’ എന്നെഴുതി വയ്ക്കപ്പെട്ട ഫലകവും ലഭിച്ചു.ഈ വിഷമ സന്ധികളില്‍ ജറുസലേം മെത്രാനായിരുന്ന മക്കരിയുസ് അവരെ സഹായിക്കാനായി സ്വര്‍ഗത്തില്‍ നിന്ന് ഒരു അടയാളം ഉണ്ടാകുവാന്‍ പ്രാര്‍ത്ഥിക്കുകയും അദ്ദേഹത്തിന്‍റെ പ്രാര്‍ത്ഥന ഫലിക്കുകയും ചെയ്തു.
അവിടെ ദീര്‍ഘകാലമായി കഠിനരോഗം ബാധിച്ച ഒരു സ്ത്രീ ഉണ്ടായിരുന്നു.രോഗം ബാധിച്ച് അവര്‍ ആസന്നമരണയായിരുന്നു.അമൂല്ല്യമായ കുരിശില്‍ സ്പര്‍ശിച്ചാല്‍ അവള്‍ സുഖപ്പെടും എന്നു വിശ്വസിച്ചുകൊണ്ട് ഓരോ കുരിശിലും സ്പര്‍ശിച്ചു.ആദ്യ രണ്ടു കുരിശിലും സ്പര്‍ശിച്ചപ്പോള്‍ മാറ്റമൊന്നും ഉണ്ടായില്ല.എന്നാല്‍ മൂന്നാമത്തെ കുരിശില്‍ തൊട്ടപ്പോള്‍ അവള്‍ പൂര്‍ണ്ണമായും സുഖം പ്രാപിച്ചു.അത് കര്‍ത്താവിന്‍റെ കുരിശാണെന്ന് ഏവരും തിരിച്ചറിഞ്ഞു.
പ്രിയമുള്ളവരെ,ഇതു വിശുദ്ധ കുരിശിന്‍റെ പുകഴ്ചയുടെ തിരുനാള്‍ കാലം.ഹെലേനാ രാജ്ഞി തന്നെയാണ് തിരുകല്ലറ നിന്ന സ്ഥലത്ത് ഒരു ദൈവാലയം പണികഴിയിപ്പിച്ചത്.വിശുദ്ധ കുരിശിന്‍റെ ഒരു ഭാഗം,ഒരു വെള്ളിപ്രാത്രത്തില്‍ അടക്കം ചെയ്തു കാണുവാന്‍ ആഗ്രഹമുള്ളവര്‍ക്കുവേണ്ടി ആ പള്ളിയില്‍തന്നെ സ്ഥാപിച്ചു.ബാക്കിയുള്ള കുരിശിന്‍റെ ഭാഗം ചക്രവര്‍ത്തി കോണ്‍സ്റ്റാന്‍റിനോപ്പിളില്‍ സൂക്ഷിച്ചു.പിന്നീട് വിശുദ്ധ കുരിശ് ലോകത്തിന്‍റെ വിവിധ ഭാഗങ്ങളിലേക്കു പലരും പങ്കിട്ടെടുത്തുകൊണ്ടുപോയി ലോകം മുഴുവനുള്ള ഭക്തജനങ്ങള്‍ ആ കുരിശിനെ ഭക്ത്യാദരപൂര്‍വ്വം വണങ്ങുന്നു.സെപ്റ്റംബര്‍ 14 വിശുദ്ധ കുരിശിന്‍റെ പുകഴ്ചയുടെ തിരുനാളാണ്.
ക്രൈസ്തവര്‍ ഭക്ത്യാദരപൂര്‍വ്വം ആചരിക്കുന്ന എട്ടുനോമ്പിന്‍റേതാണ് സെപ്റ്റംബര്‍ ആദ്യത്തെ എട്ടുനാളുകള്‍.ജീവിത്തതിന്‍റെ ആത്മീയനവീകരണമാണ് എല്ലാ നോയമ്പുകളുടെയും അത്യന്തികലക്ഷ്യം.ഉപവാസം,ദാനധര്‍മ്മം,നീതി എന്നിവയോടുകൂടിയുള്ള പ്രാര്‍ത്ഥന ഫലം ചെയ്യുന്നു.ബാഹ്യമായ ആചാരനുഷ്ഠാനത്തേക്കാള്‍ അന്തരീക ചൈതന്യമാണ് ഉണ്ടാകേണ്ടത്.ജോയേല്‍ പ്രാവാചകന്‍റെ പ്രബോധനം ശ്രദ്ധേയമാണ്.’നിങ്ങളുടെ ഹ്യദയമാണ്,വസ്ത്രമല്ല കീറേണ്ടത്.നിങ്ങളുടെ ദൈവമായ കര്‍ത്താവിങ്കലേക്കു മടങ്ങുവിന്‍” നിങ്ങളെത്തന്നെ കഴുകി വ്യത്തിയാക്കുവിന്‍ എന്ന ഏശയ്യായുടെ പ്രവചനഭാഗവും ഇതിനോടു ചേര്‍ത്തുവായിക്കാവുന്നതാണ്

ഒത്തിരി സ്നേഹത്തോടെ………
പ്രശാന്തച്ചന്‍

 

സ്വര്‍ഗ്ഗത്തിന്‍റെ വഴികള്‍

 

ഒരിക്കല്‍ ഒരാള്‍ ഈശോയോടു ചോദിച്ചു: കര്‍ത്താവേ, രക്ഷപ്രാപിക്കുന്നവര്‍ ചുരുക്കമാണോ? അവിടുന്നു പറഞ്ഞു: ഇടുങ്ങിയ വാതിലിലൂടെ പ്രവേശിക്കുവാന്‍ പരിശ്രമിക്കുവിന്‍. ഞാന്‍ നിങ്ങളോട് പറയുന്നു, അനേക പേര്‍ പ്രവേശിക്കാന്‍ ശ്രമിക്കും. എന്നാല്‍ അവര്‍ക്ക് സാധിക്കുകയില്ല. (ലൂക്കാ.13:23-24).
ഒരു ചൊല്ലുണ്ട്: ജീവിതം മനുഷ്യനെ കാണുന്നത് എപ്പോഴും നാല്ക്കവലയിലാണ്. ജീവിതത്തിലെ ഏതു പ്രവൃത്തിക്കും മനുഷ്യന് ഒരു തിരഞ്ഞെടുപ്പ് നടത്തുക ആവശ്യമാണ്. അതിനെ അവഗണിക്കാന്‍ അവന് സാധ്യമല്ല. കാരണം, നാല്ക്കവലയില്‍ നിശ്ചലനായി നില്ക്കാന്‍ പറ്റുകയില്ല. ഏതെങ്കിലും ഒരു വഴി അവന്‍ തെരഞ്ഞടുക്കണം.
തന്‍റെ അന്ത്യം അടുത്തപ്പോള്‍, മോശ ഇസ്രയേല്‍ക്കാരോട് പറഞ്ഞു: ഇതാ, ഇന്നു ഞാന്‍ നിന്‍റെ മുമ്പില്‍ ജീവനും നന്മയും, മരണവും തിന്മയും വച്ചിരിക്കുന്നു. ജീവനും മരണവും അനുഗ്രഹവും ശാപവും ഞാന്‍ നിന്‍റെ മുമ്പില്‍ വച്ചിരിക്കുന്നു എന്നതിന് ആകാശത്തെയും ഭൂമിയെയും ഞാനിന്ന് നിനക്കെതിരായി സാക്ഷിയാക്കുന്നു. നീയും നിന്‍റെ സന്തതികളും ജീവിക്കേണ്ടതിന് ജീവന്‍ തിരഞ്ഞെടുക്കുക. കര്‍ത്താവിനെ സ്നേഹിച്ച് അവിടത്തോട് ചേര്‍ന്നു നില്ക്കുക. നിനക്ക് ജീവനും ദീര്‍ഘായുസ്സും ലഭിക്കും. നിന്‍റെ പിതാക്കന്മാരായ അബ്രഹാത്തിനും ഇസഹാക്കിനും യാക്കോബിനും നല്കുമെന്ന് കര്‍ത്താവ് ശപഥം ചെയ്ത ദേശത്ത് നീ വസിക്കുകയും ചെയ്യും. (നിയ.30:15-20). ജോഷ്വാ, തന്‍റെ ജീവിതാന്ത്യത്തില്‍, ഇസ്രയേലിന്‍റെ നേതൃസ്ഥാനം വിട്ടൊഴിയുന്ന അവസരത്തില്‍ അവരോട് പറഞ്ഞു: കര്‍ത്താവിനെ ശ്രവിക്കുന്നതിനു മനസ്സില്ലെങ്കില്‍, നദിക്കക്കരെ നിങ്ങളുടെ പിതാക്കന്മാര്‍ സേവിച്ച ദേവന്മാരെയോ, നിങ്ങള്‍ വസിക്കുന്ന നാട്ടിലെ അമോര്യരുടെ ദേവന്മാരേയോ ആരെയാണ് സേവിക്കുക എന്ന് ഇന്ന് തന്നെ തീരുമാനിക്കുവിന്‍. ഞാനും എന്‍റെ കുടുംബവും കര്‍ത്താവിനെ സേവിക്കും. (ജോഷ്വാ.24:15). ജെറെമിയായിക്ക് ദൈവത്തിന്‍റെ അരുളപ്പാടുണ്ടായി. “ഈ ജനത്തോട് പറയുക: കര്‍ത്താവ് അരുളിചെയ്യുന്നു: ജീവന്‍റെയും മരണത്തിന്‍റെയും മാര്‍ഗ്ഗങ്ങള്‍ ഇതാ, നിങ്ങളുടെ മുമ്പില്‍ ഞാന്‍ വെയ്ക്കുന്നു. (ജെറ.21:8).” തിന്മ മൂലം ഇസ്രയേല്‍ക്കാര്‍ എത്തിച്ചേര്‍ന്ന ദുരവസ്ഥയെക്കുറിച്ച് ജെറമിയ അറിയിച്ചു: “ദുഷിച്ച ഈ തലമുറയില്‍ അവശേഷിക്കുന്നവര്‍ക്ക്, ഞാന്‍ അവരെ ചിതറിച്ച അടിമത്തത്തിന്‍റെ നാടുകളില്‍ ജീവനെക്കാള്‍ മരണം അഭികാമ്യമായി അനുഭവപ്പെടും-സൈന്യങ്ങളുടെ കര്‍ത്താവ് അരുളിചെയ്യുന്നു. (ജെറ.8:3).
നാശത്തിലേക്കും ജീവനിലേക്കും നയിക്കുന്ന വാതിലുകളെയും വഴികളേയും കുറിച്ച് ഈശോ അറിയിച്ചത് വി.മത്തായി രേഖപ്പെടുത്തുന്നു. വിനാശത്തിലേയ്ക്ക് നയിക്കുന്ന വാതില്‍ വിസ്തൃതവും വഴി വിശാലവുമാണ്. എന്നാല്‍ ജീവനിലേക്ക് നയിക്കുന്ന വാതില്‍ ഇടുങ്ങിയതും, വഴി വീതികുറഞ്ഞതുമാണ്. അതു കണ്ടെത്തുന്നവരോ ചുരുക്കം. (മത്താ.7:13-14).
സോക്രട്ടീസിന്‍റെ ശിഷ്യനായിരുന്ന സെബെസ് അദ്ദേഹത്തിന്‍റെ ഒരു കൃതിയില്‍ എഴുതുന്നു: “നിന്‍റെ മുന്‍പില്‍ ഒരു ചെറിയ കതക് കാണുന്നോ? അതിന്‍റെ മുമ്പിലുള്ള വഴിയില്‍ യാത്രക്കാര്‍ കുറവാണ്. ആ വഴിയാണ് പ്രബോധനത്തിലേയ്ക്ക് നയിക്കുന്നത്.” നന്മയുടെ പ്രബോധനം ദൈവത്തിന്‍റെ വഴിയാണ്.
ഇരുവഴികളുടെയും വ്യതിരിക്തത ചൂണ്ടിക്കാണിക്കുന്നത് സംഗതമെന്നു കരുതുന്നു
1. പ്രയാസമേറിയ വഴിയും എളുപ്പ വഴിയും
മഹത്വത്തിലേയ്ക്ക് എളുപ്പവഴികളൊന്നുമില്ല. മഹത്വം സമര്‍പ്പണത്തിലൂടെയും അദ്ധ്വാനത്തിലൂടെയുമാണ് ഉരുത്തിരിയുക. ഒരു ഗ്രീക്ക് കവിയായിരുന്ന ഹെസിയോഡ് പറയുന്നു: അധമമായത് എളുപ്പവും അവസരങ്ങള്‍ ധാരാളം ഉള്ളതും, വഴി മിനുസവും പ്രയാസങ്ങളില്ലാത്തതുമാണ്. അത് അടുത്തുതന്നെയുണ്ട്. പക്ഷേ, നന്മക്കു മുമ്പില്‍ അദ്ധ്വാനവും വിയര്‍പ്പൊഴുക്കലും ദൈവം ആവശ്യപ്പെടുന്നു. ആയാസരഹിതമായതുവിട്ട്, പ്രയാസമേറിയത് തിരഞ്ഞെടുക്കുക.
ഒരിക്കല്‍ എഡ്മണ്‍ഡ് ബുര്‍ക്ക് ഹൗസ് ഓഫ് കോമണ്‍സില്‍ മഹത്തായ ഒരു പ്രസംഗം നടത്തി. അതിനുശേഷം അദ്ദേഹത്തിന്‍റെ സഹോദരന്‍ റിച്ചാര്‍ഡ് ബുര്‍ക്ക് വളരെ ചിന്താമഗ്നനായി കാണപ്പെട്ടു. കാരണം ചോദിച്ചപ്പോള്‍ അദ്ദേഹം പറഞ്ഞു: ഞാന്‍ അത്ഭുതപ്പെടുകയായിരുന്നു, എഡ്മണ്‍ഡ് എങ്ങിനെയാണ് ഞങ്ങളുടെ കുടുംബത്തിന്‍റെ പ്രതിഭയെല്ലാം കുത്തകയാക്കിയത്! പക്ഷേ, ഞാന്‍ ഓര്‍ക്കുന്നു, ഞങ്ങള്‍ കളിയിലും മറ്റും സമയം ചെലവഴിച്ചപ്പോള്‍ അദ്ദേഹം എപ്പോഴും അദ്ധ്വാനത്തിലായിരുന്നു. ചിലര്‍ കാര്യങ്ങള്‍ എളുപ്പമാക്കിയെന്നു തോന്നിയാലും ആ എളുപ്പമാക്കലിന്‍റെ പിന്നില്‍ നിര്‍ത്താത്ത അദ്ധ്വാനമുണ്ട്.
2. നീണ്ട വഴിയും കുറിയ വഴിയും
ഒരു കാര്യവും നിമിഷ നേരം കൊണ്ട് പൂര്‍ണ്ണവും കുറ്റമറ്റതുമായിത്തീരുകയില്ല. നേട്ടങ്ങള്‍ നീണ്ട അദ്ധ്വാനത്തിന്‍റെയും സ്ഥിരമായ ശ്രദ്ധയുടേയും ഫലമാണ്. ഹോരസ് അദ്ദേഹത്തിന്‍റെ കാവ്യകലയില്‍ പീസോയെ ഉപദേശിക്കുന്നു: ഒരു പുസ്തകം എഴുതികഴിഞ്ഞാല്‍ ഒമ്പതു വര്‍ഷത്തേയ്ക്ക് അടുത്തു തന്നെ വയ്ക്കുക. തിരുത്തലുകള്‍ നടത്തുക. അതിനുശേഷമേ പ്രസിദ്ധീകരിക്കാവൂ. അദ്ദേഹം തന്നെ പറയുന്നു: പ്രസിദ്ധ നിരൂപകനായിരുന്ന ക്വിന്‍റീലിയാസിന്‍റെ അടുത്ത് ഒരു ശിഷ്യന്‍ ഒരു കൃതിയുമായി ചെന്നു. അദ്ദേഹം എല്ലാം നോക്കിയശേഷം പറഞ്ഞു: ഇതുകൊണ്ടുപോയി തീയിലിടുക! വീണ്ടും നന്നായി പരിശ്രമിക്കുക. ‘തോമസ് ഗ്രേയുടെ ഗ്രാമീണദേവാലയങ്കണത്തില്‍ എഴുതിയ വിലാപകാവ്യം’ ഒരു അനശ്വരകാവ്യമാണ്. 1742-ല്‍ ആരംഭിച്ച പ്രസ്തുത കൃതി 1750-ല്‍ ആണ് സ്വകാര്യമായി പ്രചാരത്തിലായത്. ആര്‍ക്കും എളുപ്പത്തില്‍ ഒരു കലാസൃഷ്ടി പൂര്‍ണ്ണതയില്‍ എത്തിക്കാന്‍ സാധിക്കുകയില്ല. രണ്ടു വഴികളാണ് നമുക്കു മുന്നിലുള്ളത്. എളുപ്പം ഫലം കാണാമെന്നു തോന്നിപ്പിക്കുന്ന കുറിയവഴിയും, ഫലത്തിനായി ഏറെ അദ്ധ്വാനിക്കേണ്ടി വരുമെന്നു ചൂണ്ടിക്കാണിക്കുന്ന ദീര്‍ഘമേറിയ വഴിയും. അദ്ധ്വാനമേറിയ ദീര്‍ഘ വഴിക്കു മാത്രമേ നിലനില്ക്കുന്ന ഫലങ്ങള്‍ ഉളവാക്കാന്‍ കഴിയുകയുള്ളൂ.
3. അച്ചടക്കമുള്ള വഴിയും അച്ചടക്കമില്ലാത്ത വഴിയും
ശിക്ഷണമില്ലാതെ ഒന്നും നേടാന്‍ സാധിക്കുകയില്ല. ശിക്ഷണം അവഗണിച്ച് ഉദാസീനതയിലും അശ്രദ്ധയിലും കഴിഞ്ഞ് വളരെപ്പേര്‍ ജീവിതം നശിപ്പിച്ചിട്ടുണ്ട്. താലന്തുകളുടെ ഉപമയില്‍ ഈശോ ഇതാണു ചൂണ്ടികാണിക്കുന്നത്. അഞ്ചുതാലന്തു കിട്ടിയവന്‍ ഉടനെ പോയി വ്യാപാരം ചെയ്ത് അഞ്ചുകൂടി സമ്പാദിച്ചു. രണ്ടുതാലന്തു കിട്ടിയവന്‍ രണ്ടുകൂടെ നേടി. ഒരു താലന്തു കിട്ടിയവന്‍ പോയി നിലം കുഴിച്ച് യജമാനന്‍റെ പണം മറച്ചുവച്ചു. താലന്ത് വര്‍ദ്ധിപ്പിച്ച് ഇരട്ടിയാക്കിയ വിശ്വസ്തരായ ഭൃത്യന്മാരെ ജയമാനന്‍ അനേകകാര്യങ്ങള്‍ ഭരമേല്‍പ്പിക്കുകയും അദ്ദേഹത്തിന്‍റെ സന്തോഷത്തിലേയ്ക്ക് പ്രവേശിപ്പിക്കുകയും ചെയ്തു. യജമാനന്‍ നല്കിയ താലന്ത് മണ്ണില്‍ മറച്ചു വച്ച ദുഷ്ടനും മടിയനുമായ ഭൃത്യനില്‍ നിന്ന് ആ താലന്ത് തിരികെ എടുക്കുകയും അതിനെ പുറത്ത് അന്ധകാരത്തിലേയ്ക്ക് തള്ളിക്കളയുകയും ചെയ്തു. (മത്താ.25:14-30). ശിക്ഷണമുള്ള ജീവിതത്തിന്‍റെ മഹത്വവും ശിക്ഷണ രഹിത ജീവിതത്തിന്‍റെ നാശവുമാണ് ഇവിടെ ചൂണ്ടിക്കാണിക്കപ്പെടുക.
4. ആലോചനാ നിര്‍ഭര വഴിയും ആലോചനാ രഹിത വഴിയും
ആലോചനാ നിര്‍ഭരന്‍ എളുപ്പവഴിയും കുറിയവഴിയും ശിക്ഷണരഹിതവഴിയും പാടേ തള്ളിക്കളയുന്നു. അതേസമയം ആലോചനാ രഹിതന്‍ ആ വഴികളെ സ്വീകരിക്കും. ഏതു കാര്യത്തിനും രണ്ടു വശങ്ങളുണ്ട്. ഇപ്പോള്‍ എങ്ങനെ കാണപ്പെടുന്നു, വരാനിരിക്കുന്ന കാലത്ത് എങ്ങനെയായിരിക്കും. എളുപ്പവഴി ഇപ്പോള്‍ ആകര്‍ഷകമായി തോന്നും. പക്ഷേ, വിനാശത്തിലായിരിക്കും നയിക്കുക. അദ്ധ്വാനത്തിന്‍റെയും കഷ്ടപ്പാടിന്‍റെയും വഴി ഇപ്പോള്‍ വൈഷമ്യമേറിയതായി തോന്നാം. എന്നാല്‍ അതാണ് ജീവനിലേക്കു നയിക്കുന്ന വഴി.
മൂല്യങ്ങളുടെ ശ്രേഷ്ഠത, വഴിയുടെ ആരംഭത്തിലല്ല അന്ത്യത്തിലാണ് പൂര്‍ണ്ണതയില്‍ കാണപ്പെടുക. ഏതു കാര്യവും തല്‍ക്കാലത്തേക്കല്ല നിത്യതയുടെ വെളിച്ചത്തിലാണ് കാണേണ്ടത്.